講廣東話！聽廣東歌！

共匪欲消滅廣東話嘅陰爪，已經靜悄悄而又大大聲咁，越過咗羅湖橋，南下香港！

廣東話，係我哋嘅命，我哋嘅根！如果真係要攞我命，唯有同你搏命！

我愛叉燒飽！我愛艇仔粥！我講廣東話！我聽廣東歌！

廣東歌係廣東話靈魂嘅一個具體表現，從唐滌生到黎彼得，白駒榮到張國榮，所有廣東好漢、香江兒女，冇人會唔支持我哋自己嘅地道文化：粵語流行曲！

喺呢度share 10 張我自己好鐘意，同埋覺得有時代意義嘅主流本地唱片 (indie唔計)，聊表對廣東歌同本土理念嘅支持。排名順面世年份。

學最近某個被炒嘅名嘴話齋，廣東話往後嘅日子，一定耐過你個中共政權多多多多聲咯！

本土！反共！屌哪媽！頂硬上！




1.《六啤半》～ 雜錦碟 (1980)
隨香港經濟起飛而冒起嘅商業電台唱片騎師雜錦專輯，題材從青年勵志、歌頌友情到生老病死，充滿都市生活靈感。商台亦開始喺俞琤領導下，主宰本地樂壇潮流直至今時今日。

2.《愛情陷阱》～ 譚詠麟 (1985)
從《霧之戀》到《愛的根源》再嚟到《愛情陷阱》呢個三連霸位，就知咩叫真正紅透半邊天！專程請嚟日本人芹澤廣明作曲嘅一首〈愛情陷阱〉，橫掃港九各大的士高，完全制霸。呢個時候香港嘅普及娛樂工業，亦喺東南亞市場全面登頂。

3.《劉美君》～ 劉美君 (1986)
八十年代尖東海旁老泥妹生態與富豪式夜總會銷金窩風情共冶一爐。劉美君演繹出一份早熟得滄桑、看透歡場裡無真心嘅風塵氣味，自成一家，別無分號。

4.《石頭記》～ 達明一派 (1987)
公認嘅達明巔峰之作，〈馬路天使〉、〈傷逝〉、〈崩裂〉、〈後窗〉、仲有主題曲〈石頭記〉全部神級。雖然後來嘅《我等著你回來》、《你還愛我嗎？》、《神經》等唱片統統都係堅嘢，但係都去唔到呢隻樂隊首張大碟嘅高度。

5.《花街七十號》～ 林子祥 (1987)
阿 lam有好多專輯都好正，例如又hot又吋嘅串燒歌代表作《十分十二吋》、將俄羅斯民歌改編成潮流恩物嘅《活色生香》等。個人至鐘意係呢隻《花街七十號》，兩首翻唱歌〈花街七十號〉同〈上癮〉都有型有格，林振強填詞嘅〈一世離開你〉，足以令人聽到心碎又鼻酸。

6.《愛花的少年》～ 浮世繪 (1989)
一張「中國美少年」式art pop專輯，喺英倫電子化樂風中蟄伏一份陰柔嘅頹廢美。一曲〈月滿繁星夜〉恍若自'night porter'與〈禁色〉起承轉合，為幽美三部曲點上句號。

7.《1989》～ 盧冠廷 (1989)
淨係打正「六四」旗號，已經足以令呢張大碟名垂青史！一曲〈漆黑將不再面對〉任何時候聽都震盪人心。

8.《野花》～ 林憶蓮 (1991)
sandy lam脫去都市跳動脈搏外衣，締造以女性為主題嘅概念專輯，散發紅顏易老，浮生若夢嘅纖細感應，婉約而流麗，奠定香港首席sophisticated diva地位。

9.《樂與怒》～ beyond (1993)
黃家駒殉樂前最後一戰，將beyond帶上頂峰，亦成為香港樂迷心裡面永遠不可磨滅嘅一道深刻傷痕。專輯喺音樂風格上全面開花。如果有日香港獨立，〈海闊天空〉可能最有資格成為香港國歌。

10.《麻木》～ 劉以達 (1996)
「非池中」雖然係一個曇花一現嘅 label，但係就曾經爆炸性咁祭出呢張頂兒尖兒唱片。阿達危立主流與另類臨界，地面地下定界限，猙獰，詭異，冷艷，無序，顛覆我哋嘅聽覺，直取神經G點，完全世界級。