阿妹的情人(上)

今天是 十一月十七日 ，林振強逝世四年了。

如果洋蔥頭喺嗰日入大學，今天也畢業了。


「站在海旁時，浪漫之士會認為自己在看海，不浪漫的人會認為自己在睇水。」這是林振強金句。五十六年，匆匆而過，林振強覺得自己在看海，還是睇水呢？

六十年代，斯文女仔唔鍾意男仔留長頭髮。那時的林振強，正值青春期，當然好想識女仔。但，他是一個唔妥協的 rock友，電結他就是他的好朋友，而 rock友的標誌是：留長頭髮，表示對社會有好多不滿，好很搖滾。學校髮禁，唔會讓步！於是，林振強被趕出校了。

其實，亦唔係所有女仔，都討厭長髮男子。飛女，就鍾意留長頭髮的飛仔。但林振強不是飛仔啊，他是個好有態度的滾友，寧願將下體內滾動的熔岩，化造憤怒力量。於是，林振強溝唔到女。

校園情場，兩不得意，經歷少年李察的煩惱，林振強遠走高飛，赴美國加州柏克萊升學。回港後，輾轉進了家姐與男友合組之廣告公司的林振強，終於發現自己的電結他技術，其實麻麻哋，唔及寫嘢好，於是開始撰撰廣告稿。寫啲咩呢？譬如：「 一公升 可口可樂 一公升 雪碧。 一公升 可口可樂 一公升 雪碧。我都係話 一公升 可口可樂 一公升 雪碧！」又譬如：「喺陽光裡頭，啲樹靚啲，啲檸檬靚啲，啲茶靚啲，所以陽光檸檬茶就好飲啲。」於是，林振強紅咗。

成了名創作人後，林振強有時會上電台接受訪問。主持人問，怎樣才可加強創作力呢？答：「咩書都睇吓咁啦，譬如《螞蟻的社交生活》嗰啲啦。」有時，林振強又會被邀請擔任歌唱比賽評判。主持人問，這個參賽者唱「霧之戀」唱得好嗎？答：「佢唔係好學譚詠麟噃，有自己喺霧裡頭既辦事方法。」

不知是甚麼時候，林振強打工的「華美廣告公司」，創作部來了個死鬼佬，激活了林振強的搖滾憤怒因子。從此，他下午便自公司消失，走到附近的茶餐廳填詞，兼狂扯煙。公司客戶服務部的女同事見了他如見鬼一樣。有一天，林振強打電話給服務過的前客戶，想攪傳媒的黎智英，最後，他為這個集團改了個名，叫「壹傳媒」，自己亦加入其中，幾年後，入埋 board。於是，林振強發咗達。